DIALET: L’ Architett o … larchigamb?
Sem sempar sü chèla solfa

Tii ti che sett ben al dialètt coma te disaressat “They will never grow up”?

Grazie per al dialètt te ma ciapatt come sempro ala scproviscta… dunca… par mi al sarissa: “Al brutt da diventà vecc l’è da rèsctà sempro fiöö”.

Al savevi che ti an sett vüna püsse dal diavol.

Mah sa vöratt ho sctudiaa cunt al librètt dala comperativa e, dopo, ma somm sempro domandaa ul parchè.

Parchè alora gh’emm in giir insci tanti larchitétt?

Larchitett o larcigamb l’è pö losctess tant salvo pochissim jenn tücc di disegnadoo che dopu avé fai la scöla da asisctent contrari e i senn fai ciamà tücc architétt.

D’altra part bascta guardà i risültaat.

Te ma la …

Va mia a menamala püsee da quèl tant, par vèss architett gh’a va vègh anca vün che al ta disa:”mettum in ordin chi o là”, disi mia un Giüli nümar düü …

… altrimenti fett di ca che parann di monument, di gees che paran la brüta copia dal Circo Knie e quando fett un scuaicoss da nööf devat sempro copiall d’ona quai altra paart…

Altrimenti ta vegn föra di ca che i gh’ann la grazia da un lotadoo da Sumo piantaa coi do bei gambett immez ala natura o ala cità o in dal centro …

Parlando da copià fett par dì al San Carlin che al passa par vèss na “personale invenzione ed interpretazione dell’artista”, ma se vett a guardà al libro dal Martinola, traii insema dal Dipartimento dell’Educazione da quii tempi la, ala figura nümar trii vedat la sctessa roba?

L’avevi propi pensada anca mi.

Ciapa un paes anca ammò come incöö come l’è traii inséma: gh’è ammò sempro la gesa in mèzz. Ma l’è mai possibol che quando gh’è mia la gesa gh’è nigott d’altro?

Per parlà da gées, quando javevan cambiaa la pianta da bizantina ala noscta dal di d’incoo, javevann cambiaa tücoos. Ciapa adèss: jann cambia al sisctema da di mèssa. Ti te credat che jann cambiaa un scuaicoss?

Nülla, oregiatasc marsc, nülla

Jann volta l’altar e bascta. Alora ti vedarissat, par esempi, par mia scombüssulatt tropp, che la centro d’un paees nööf gh’a sarissa, che sommi, un supermercato?

E parché no? E a l’ültim pian, insema al risctorant, anca la gésa faia come un cinema.

Impienissat la panza e tirat a fil lo spirito.

Ma parchè vett mia giò a Mindriis a insegnà?

A insegnà! A insegnà chi che i sann già tücoos …

Ma tel sett che questo Ghemme l’è propi mia da bütà via?

Gh’era sctai un moment che l’eva propi ciurlina.

Nünn a semm mia dei proseliti come “architetti paesaggisti” dal Parker, al guru dal vin che adèss tücc gha curann adré?

Di mia tücc, parchè al nosct ” gastronome” al sa mia chi l’è.

A ….(voce dal fondo: ) A riss e verz!!! … e l’i dii voialtri.