(L'important per diventà vecc l'è mia vess bravo ma l'è scampà tantu:
Auguri a Giorgio Orelli!!!)

Sögnà. Vör di che te bramat un sccuaicoss?

Cosa sett dré a cüntà sü. Gh’ò l’impression che ti te gh’avrissat bisögn da un para da mees da vacanza. Ti e la tusa dal to fiöö. A proposit ma quell lì al turna piü indré? Scüsumm se tal domandi ma ann parlat mai.

An parlat mai, an parlat mai. Facil par ti. Ti e la to zighitinfrìn …

Ma am parr, o l’è vera, che gh’ett un scuaicoss da cüntamm sü e te gha la fett migna?

Ma lassum pal mè bröö. Sevi a dré a ramatigagh adré a sti sögn … alura …

Alura …

Alura, alura l’è difficil da scpiegal.

Sentumm un po’. Mi vöri mia mètt dent al naas in di tò gabol. Semm soci. Alora, sicome t’è mia mazzà nissün e: “ gli amici si conoscono nel bisogno”, ma pareva che, magari, in questo caso, avrissa poduu datt na man …

Ma che man vött damm. Al mè fiöö, si l’è nai via da ca, ma al s’era mai scposaa. Eco.

Mai scposaa? Alora quèla che gh’ett in ca … ma chi l’è. Famm mia scta süi gücc.

Chi l’è. Chi l’è …

Ma mettat mia adré a piang. Gh’è mort nissün. Ogni sctoria la gh’a la sò fin. Tütt sa giüscta. Tütt sa drizza. Tütt và posct….…Lila porta un para da “beby”.

Da quii da cinquant’ann o an vöruf da quii andant, voialtri cagadübi …

Da quii da votanta. Dees franc al trüss …

Bonn, bonn però. Ah, … a ma par già da sctà mei.

Ma scüsumm, t’avré mia fai tüta scta manfrina per fatt ofrì da beef, alivolti.

No, no. Adess ta cünti sü: Quando gh’è mort la mè dona, dopo tütt quèll trambüsct e al fiöö scapàa via, te sa regordat, sevi nai a Santo Domingo.

Ma si, cont al to amis avocatt. Ch’el matt par quii donn lì. Ma …

Ma nünn a tacavumm mia liit. Lü ja scern doma brütt. Dopo un po’ ca sevumm lì, ma na somm trovaa vüna e dagh incoo dagh domann, dopo tri mees, la gh’è resctada. La ma diseva sempro che mi seri al massim e mi gh’ho credüü …

Alora?

Alora. In cinc e trivott l’ho scposada. Somm tornaa a ca. Quando l’ha scgravàa l’è vegnüda in sü e mi l’ ho fada passà come la dona dal mè fiöö. Al nomm l’è lisctess. …

Oh porca vaca d’una … Ma sent Ninn: cosa jenn adèss scti problemi?

Al so verament mia. Adèss ma senti mei. Sa veed che al mè sogn l’era da digal con un quai dünn. Daman düü intregh. Paghi tütt mi incöö Ma somm tiraa via un pees dal sctomich che al so domâ mi.

Ciao

Ciao e acqua in boca

Ma va la!