(Pensat che la sia al massim?)

Guarda un pò quèla li.

La gh’à piü’ gnènt da mètt in mosctra, da scund.

Cert che, incöö, i sciuri i giran piü con la rolls, al catramèll, e al bavar da vélü.

I sa vesctissan come i barbòn.

Che giran in Mercedes jenn domà quii di taxi. Loor i gh’ànn i danee ai Caraibi. Hess, hess!

Salute! Chi che dopra al telefonìn jenn i pori mosctri, i operari che te devat sempro trova pront.

Jenn doma i mèzz calzett, o i schwitzer tudesch, che i sà vesctissan dala fèsta. Dopo però chi gh’hann i danee i pretendan da fa tütt i so pütanaad come se gnente fosse. Mai na a vedé dent in di so gabol!

Perchè, alora, te vé dént la so “privacy”!

Tütt parchè vün al vöö fa vedé a un altro quèl che al pò mia vèss o vorè, te capissat? Cèrt che i nosct amiis, uregiatt come ti, l’è mia che jann cercaa da mètt a posct i ori.

Piantala da mètt tütt in politica.

Ma benedèto! Guarda un atim a quèl poro Clinto!

Para mi al Clinto l’è domà na gamba d’üga.

Si si riid. Rid che la mamm l’ha faa i gnocch.

Adèss che la Jones la s’è fada al naas da növ, coma la farà a vèrd i botigliétt dala bira?

Ah ah, bèla quescta. Chi ta l’ha dii?

L’ho lengiüda in vüna da quii büstin dall’Eco.

Quando vün l’è bravo l’è bravo. Pensa sempro a quèll li che bosard coma l’è a vöö damm d’intend che …

Ciao Gnazi!

Ma al salüdat ammò quèll li dopo quèll che te gh’é dii l’ultima volta?

Si parchè a ma végn da ridd … alora ta disevi, busard come l’è, al voreva fà al sinceer e, par fa al sinceer, al cüntava sü una roba föra da tescta come se, pensa un po’ a nünn chi inscì, se un pulitic al sa farissa fà un servizietto da una segretaria al sarissa mia “relazione sessuale” …

Ah, ah, ah, oh santo Cielo! Ma indoa vett a tö’ quii paragòn li! Credonn a mi. L’è però dificil scpiegagh a un protesctant che, se te sa tocat, ta vet a l’inferno a la stessa manera cumè rampeghan vüuna da quindas ann in mezz à la strada.

E che, tütt al piü, te dovrissat cambià da giir, giò dal diavul…

L’ünica diferenza la sarissa questa…

Oila! S’è fai tardi.

Pensat mia ca semm nün, tropp inteligént?

Ma va lâ

Incöö paghi mi.