Porcü du’un sciampìn ma sett propi un ciciaréta.

Gh’ho nisünissima culpa. Mi gha l’ho dii al Marsilio e al Marsilio l’ha parlaa cont al Toto, e al Toto gha l'ha dì col Gnazi…

Al Toto, al Toto. L’è cha la finn a quèll là i gh’hann dii “l’è che al Ninn l’ha dii”…

Ma se ti confermat quèl che te dii! Alora l’è vera e parchè te sa la casciat tanto… Se la gent la và innanz come fà rotolà un scerc, se la legge dal Pierce che la diis: “che tücc quii che i gh’hann süccèss l’è domà parchè jenn stüpid o vegnann nominaa parchè inscì i podann mia fà dagn o giò da li”, cosa te s’an casciat püsee da quèl tant…

Ghett rasòn anca ti. Ma, a mi, ma sarissa piasüü spiataraghal mi sü al müson da quell li. Ala bruto Dio. Invece …

Te visct cosa ghè saltaa föra. Alora … Liberati cielo! La mamm di cojòn l’è sempro incinta!

La legge dal Menga l’è ammò na volta quèla giüscta.

Confermada al punto che, incöö, sentum meravili dal sciur numero uno. Sempro la solita solfa. Se vünn al ciola mia, al parla domà da donn …

Se vün al gh’ha mia un franch che cünta düü, al parla domà da bursa, guadàgn, investimént… soldi.

Se scavat sota domà un atim…, se gratatt via la crosta dal visctii dala fescta... te sa nacorgiatt che per chi essar li ghè sempro dò possibilità. Decisiòn mai. I ingléés, che jenn mia stüpid, ja ciamann i “ Yes, but …”. Alora quèl che gha và fà al farémm pö par Carlo Cudiga.

Te visct i votaziòn in …

Sent carin bel. Tal disi par l’ültima volta. Quando emm scomenciaa emm dii che avrissom mai parlaa da notizi. Semm mia giornaliscta,nünn. Loor I gh’hann bisögn, per fà lavorà al sò scervéll da notizi dal mond da föra. Nünn: i nosct idee gha j emm in züca. Da sempro.

Ma casciatatala mia püsee da quel tant. Osctia. Ta davi doma al “la” per podé rasonagh sura.

Già dopo ann e ann ten trövat la metà da quii che vann a votà che gha dann al voot a vün che l’è un sciuur.

Un signor Bonaventura. Ma sa rendat cünt?

Vün che al diis: “Siccome mi somm sciuur, votii par mi che mi va protegi.”

L’è come se un vampiro al divegnarissa president dai donatori di sangue.

Ma alora ti, cosa avrissat fai al sò posct?

Somm mia in grado da dà na riscposcta.

Somm contént, alora, da mia avégh vüü vint ann in dal trentasees.

Ta disi però che se te pensat quando nünn, chi da nün, gha davòm al voot a quii sciuri lì. Gett in davanti ai öcc cosa jann combinaa?

Certissìm: Vün che al diseva: “ La via dei mari è aperta!”

L’altro che al ta vendeva i biglitt da nà in Merica.

E quèl altro ammò che al ta ipotecava anca la camisa perchè ti te podessat avegh i danee par pagà al bigliett e nattan föra di cojoni.

Gh’e cambiaa scuaicoss … nèè??

Si adess i ta disan: “ Mi consenta”.

Ma al to cüü al brüsa come prima.

Alora…

Emm imparàa al taglian sturpiando al dialett!

Via del Teglio, Via Rovere, Campagna Adorna,…

Sveglievass gent! Riscpondii e disemm a mi e al mè soci se tütt i cazzaat che cüntum sü, quasi centvintmila, i va sudiscfan o no.

A riis e verz.

Ciao Campagna Adorna.

Ciao Sciuur.