Te ma paràt ammò turbur anca inchöö.

Parlomann mia, gh’ho la tèscta tant granda che a rivi mia gnanca a grattàmm.

Ma tel sett che a mi m’è sücèss nient? Sann come un corno.

Ti sett nai via e mi ho trovaa al Marsilio, al rapresentant dal Jägermeister. L’eva chi cunt al sò padron dala scvizzera lanterna. Al sciur “Oh schöni Tessin!“, e via vün scià un altar. Tel sett che ala matina ma somm scvegliaa e al mè neodinn al ma gratava sota i pè e al gha diseva ala mè tusa: “Vieni mamma il nonno è ubriaco!” Na boca impastada… Somm levaa sü, somm nai al cèsso e pisavi vert. Tell sett, i erb che gh’enn dént i ma fai quell’effètt li.

Tel sett che l’Anna Rita la m’ha telefonaa e la m’ha dii: “ Monte Gesero!”
L’ha indüvinà! Adess, cari i mè gent, a devuv dimm cusa l’è che vör dì “Campagna Adorna”. Pensìgh sü un atim, l’è mia che l’sia tant dificil.

Tee ma guarda li chi che vegn denta, quèla signorina. Quarant’ann par gamba e l’è sctada na “nostra rappresentante” anca a Berna. Che figüür!

Pensa un po’, la passa come quèla che l’ha portaa innanz le “rivendicazioni femminili”.

I sa votann mia gnanca tra da loor e alora parchè dovrissom votaii propi nünn! Jenn tropp diferent. Loor i gh’ann in man la ca da sempro. Ciapa i bescti: da sempro i femin jann dovüü reagì sübit per cerca da protegg i so fiöö. Insci dopo mila e mila ann jann scvilüpaa quèll che al végn ciamaa: “Sesto senso”.

Ma gh’ett propi rasòn. L’altro dì sevi dré a pensàgh adré. Pensa un po’ che quando mi a gh’ho un problema remüghi, pensi e ripensi, e dopo un para da dì gha parli ala mè dona che dopo quatar paroll in croos la ma diis: ”Ma carinn, gha và fà inscì e inscià”. In gnanca düü minütt lé la ma diis cosa devi fà per una roba che mi gh’ò pensa sü par na setimana.

Si sì, propi “sesto senso”, che al gha végn föra par natüra.

Se jenn faa inscì parchè alora i dovrissarissann cambià par nà in politica? I scomincia a parlà come i masch e alora, i donn, loor, ja capissan più e ja votann mia gnanca. Jenn pö’ da quii scarampann che gnanca sü n’isola deserta ma vegnarissa mia in ment da fagh giò la pulvera!

Eh già, se jenn püsee giovin i g’hann in testa domà da fass scposà per portà i fiöö con al fuoristrada a l’asilo e fass ciamà: “Buongiorno signora”. Rolex , anei e bracialitt, gombat föra dal finesctrinn e quando i devan mètt dént la machina per fà saltà giò scti gognìnn, apriti cielo!

Si apriti cielo, però se i gha sarissan mia loor, indoa narissom nün a…

(Guarda chi che gh’è scià!) Buongiorno signora!

“Ciao te vegnat, che devi nà ala Migrò?”

Cosa t’ho dii?

Ciao.

A riis e verz.