BONA PASQUA:
Trafic e gabol di nosct amiis
(Primavera da nünn)

Porcu d’un sciapin l’e mia pussibil

Sa ghett incöö da rémügà

Scto maledetissim trafic

Poro bamba ghè sempro sctai al trafic anca na volta. Cuuf da pori gent bianc come cagnott che i vegnivan fin scià in "calzoncini bianchi e cappellino", la machina vèrta perché i pensavann che chi gherum i palmi e alora al doveva vèss püsee cald.

Adèss i passan domà e gnanca a STINCÀ na rocia in mèzz ala strada i sa fermann piü’Al trafic al passava tütt sul quai sül "che" . Mi gha metevi cinc minüt a na a trovà i galin dal Piona,e, par Pascqua na bona mezz’ora.

Ghett sempro rasònn ti ma domandi ammò perché parli ammò con vün inscì.

Perchè som bravo e mi e mi: T a s c o l t i te capi sciur bambanèla? Ti te dovréssat, visct che sett vün che in dal partii al cünta, fatt scipegà di to soci come mai, alora, loor i disann che la Alptransit la portarà ala fin i nosct cafàr quando sa sa già, già adèss, che süi 5 mila camios che passan incöö, quando la sarà finida, domà un massim da mila cinc cent i poadrann vèss cargaa sü a Basel.

Quescto devatt fattal scipiegà da quiii mena torron!

Lüsctremass la viscta con noscta amiisa. A proposit tel sett che la vendüü al sò siit?

Voltala via, volta via al discors … e nünn dopo indoa andremm a scbatt?

Naremm indoa la va léé. Ciaar no?

Anca in gir al mond … parli dal Sant Salvadoo …

Si, magari finn a Morcò!

Na bèla idea … ma con tücc quii scwitzer tudesch li …

Sett scia anca ti, con tüta la tò inteligenza … ah, ah, ah, … come i Palesctinees.

I Palestinees come i Ticinees al fa anga rima.

Prima i gha vendan la tèra e pö quando gha l’ann benn vendüda, credendo d’avegh dai na ciulada da quii giüsct, alora, dopo, quando i scominciann a vedé e i vedann Ii primm cartei "Verboten" , alora, e domà alora, … apriti cielo.

Pensa sempro a quii altri pori divaol. Altra religiòn … altra razza … democrazia sa fa par di …

Te sett un bèl balòss ti.

Sentumm un po’ devi nà a ca a tocagh sü al filon dala schena ala mè dona perchè scta chi la ma fa batt i valvol in tèscta.

Ma la ta diseva mia, la to d'una dona, che la ghaveva sempro al maa da tescta?

Ma va la… bagolon dal lüsctar…

Ciao e Bona … Bona Pasqua.

Ciao anca a ti